चौथो द फोर्स कप खुल्ला फुटबल प्रतियोगिता २०८१: फाइनल खेल भव्य रूपमा सम्पन्न हुने तयारी

लाल बहादुर एस के
पुनर्वास माघ २७

कञ्चनपुर: पुनर्वास नगरपालिका वडा नं. १, वीर बलभद्र बस्तीस्थित न्यू बिरेन्द्र युवा क्लबको खेलमैदानमा यही माघ २९ गते बिहान ११:०० बजे चौथो द फोर्स कप खुल्ला फुटबल प्रतियोगिता २०८१ को फाइनल खेल भव्य रूपमा आयोजना हुने भएको छ।

प्रतियोगिताको फाइनल खेलमा न्यू बिरेन्द्र युवा क्लब र सुदूरपश्चिम प्रदेश नेपाल प्रहरी उपाधिका लागि प्रतिस्पर्धा गर्दैछन्। यी दुई टिमबीचको रोमाञ्चक भिडन्तले खेलप्रेमीहरूलाई थप उत्साहित बनाएको छ।

उद्घाटन खेल विशेष म्याच र सांस्कृतिक कार्यक्रम

फाइनल खेलको उद्घाटनअघि विशेष मैत्रीपूर्ण खेल आयोजना गरिने भएको छ। बोम्जन र लोप्चन टिमहरूबीच उद्घाटन मैत्रीपूर्ण म्याच खेलाइनेछ, जसले फाइनल खेलको माहोल अझ रोमाञ्चक बनाउने अपेक्षा गरिएको छ।

त्यस्तैगरी, खेलका अवसरमा तामाङ नृत्यहरू, विभिन्न संस्कृतिहरूको झल्को दिने प्रस्तुतिहरू तथा तामाङ भेषभूषा सहितका झाँकीहरू समेत प्रदर्शन गरिने भएको छ। क्लबका कोषाध्यक्ष जितबहादुर तामाङ ले यसबारे जानकारी गराउँदै प्रतियोगिता केवल फुटबल खेलसम्म सीमित नरही, सांस्कृतिक पहिचान र विविधता झल्काउने विशेष कार्यक्रम समेत समावेश गरिने बताउनुभयो।

मुख्य अतिथि तथा पुरस्कार राशि

फाइनल खेलका प्रमुख अतिथि पुनर्वास नगरपालिकाका नगरप्रमुख तोय प्रसाद शर्मा रहने भएका छन्। त्यस्तै, विशिष्ट अतिथिमा वडा अध्यक्ष, कार्यपालिका सदस्य, समाजसेवी, बुद्धिजीवी, खेलप्रेमीहरू तथा शिक्षा क्षेत्रमा योगदान पुर्याएका विशिष्ट व्यक्तिहरू उपस्थित हुनेछन्।

प्रतियोगिताको विजेता टोलीलाई रु. २,२२,२२२ नगद, ट्रफी, प्रमाणपत्र र मेडल प्रदान गरिनेछ भने उपविजेता टोलीले रु. १,११,१११ नगद, ट्रफी, प्रमाणपत्र र मेडल प्राप्त गर्नेछ। साथै, उत्कृष्ट खेलाडीहरूलाई पनि विशेष पुरस्कारको व्यवस्था गरिएको छ।

प्रतियोगिताको यात्रा

न्यू बिरेन्द्र युवा क्लबको आयोजनामा माघ १८ गतेदेखि सुरु भएको यो प्रतियोगिता सफल रूपमा सम्पन्न हुँदैछ। उद्घाटन खेलमा आयोजक टोली न्यू बिरेन्द्र युवा क्लबले गोर्खा रेजिमेन्ट क्लबलाई २-० गोल अन्तरले पराजित गर्दै सशक्त सुरुआत गरेको थियो।

प्रतियोगिताको सफल समापनका लागि विभिन्न सहयोगी संस्थाहरूको महत्वपूर्ण योगदान रहेको आयोजक क्लबका सचिव मोन्चा तामाङ ले जानकारी गराएका छन्। फाइनल खेलमा ठूलो दर्शक सहभागिता रहने अपेक्षा गरिएको छ, जसले पुनर्वास क्षेत्रलाई खेलकुद र सांस्कृतिक पहिचानको केन्द्रबिन्दु बनाउनेछ।