घाँटीमा मासु अडकेर वडाध्यक्षको मृत्यु

कञ्चनपुर, १४ चैत्र । कञ्चनपुरमा घाँटीमा मासु अडकेर वडाध्यक्षको मृत्यु भएको छ । भीमदत्त नगरपालिका–५ का वडाध्यक्ष मदन चन्द बनभोजमा भोजन गर्ने क्रममा घाँटीमा मासु अडकेर मृत्यु भएको प्रहरीले जनाएको छ । मासु अडकेर बेहोस भएका वडाध्यक्षको
शुक्रबार राति उपचारका क्रममा महाकाली अस्पतालमा मृत्यु भएको हो । जिल्ला प्रहरी कार्यालयका अनुसार शुक्रबार कार्यालयका अन्य कर्मचारीसहित वनभोज गएका वडाध्यक्ष चन्दको घाँटीमा एक्कासी समस्या देखिएपछि उपचारका लागि अस्पताल पुरयाइएको थियो । “घाटीमा मासु अड्केर बेहोस भएपछि उहाँलाई एम्बुलेन्सबाट महाकाली अस्पताल ल्याइएको हो”, जिल्ला प्रहरी कार्यालयका प्रवक्ता प्रहरी नायब उपरीक्षक अमरबहादुर थापाले भन्नुभयो, “उपचारका क्रममा राति मृत्यु भयो ।” उहाँले शव परीक्षणपछि मृत्युबारे विस्तृत जानकारी हुनेसमेत बताउनुभयो । शव महाकाली अस्पतालमा राखिएको प्रहरीले जनाएको छ । “वडाध्यक्षसहित आठ जना बेदकोट नगरपालिकाको चुनेपानी क्षेत्रमा वनभोज मनाउन गएको भनिएको छ”, थापाले भन्नुभयो ।