विशाल इन्टरटेनमेन्टको “केटो अलि कमाउने होस” गीतबाट विधानलाई ‘उत्कृष्ट म्युजिक भिडियो कन्सेप्ट अन्तर्राष्ट्रिय अवार्ड’

भारतको महाराष्ट्र राज्यको औरंगावादमा आयोजित दोश्रो रोशनी रिल्स अन्तराष्ट्रिय शर्ट फिल्म फेस्टिभल-२०२१ मा विधान कार्किले निर्देशन र बिशाल इन्टरटेनमेन्टले निर्माण गरेको “केटो अलि कमाउने होस्” गीतको भिडियोले उत्कृष्ट म्युजिक भिडियो कन्सेप्ट को अवार्ड जितेको छ । उक्त फेस्टिभलमा विश्वका करिब १०० भन्दा बढी म्युजिक भिडियोहरु प्रतिस्पर्धामा छानिएका थिए । र त्यसरी छानिएका म्युजिक भिडियोहरुबाट उत्कृष्ट ५ को मनोनयन केही समय अघि सार्वजनिक गरिएको थियो । भिडियोले नेपालबाट प्रतिनिधित्व गर्दै आफ्ना ४ बलिया बिदेशी प्रतिस्पर्धीलाई उछिन्दै प्रथम स्थान हासिल गरी अवार्ड जित्न सफल भएको छ ।

उनि सहित यो विधामा संयुक्त राज्य इमिरेट्सका सहीद रहमानले दोश्रो स्थान प्राप्त गरे भने भारतका लखन सोनवानेले तेश्रो, बृजेश मुरलिधरणले चौथो र अरुण बब्शाले पाचौं स्थान हासिल गरेका छन् । फिल्म एडुकेसन र वेलफेर फाउनडेशन ए बढले आयोजना गरेको फेस्टिभलमा भारत, लेबनान, हंगकंग, नर्वे, स्वीडेन लगायतका प्रतिष्ठित फिल्मकर्मीहरु निर्णायक मण्डलमा रहेका थिए ।

यो फेस्टिभल भारतकै एक प्रतिष्ठित फेस्टिभल हो, जसले अन्तराष्ट्रिय स्तरको मान्यता पाएको छ । गीतका संगीतकार अर्जुन पोखरेल हुन् भने गीतकार दिग्गज धौराली हुन् । सुधिर श्रेष्ठ, श्रेया सिटौला, अजय श्रीज र अस्मिता अधिकारीले अभिनय गरेको भिडियोको गीतमा सुनिल कटुवाल र समिक्षा अधिकारीको स्वर रहेको छ । भिडियोलाई विधान कार्कीले निर्देशन गरेका हुन् ।