महाधिवेशन प्रतिनिधिमा सर्वाधिक १५१७ मत ल्याएर वीर बहादुर थापा निर्वाचित, अन्य कोको छानिए हेर्नुस्

नेकपा एमालेको आसन्न दशौँ राष्ट्रिय महाधिवेशनमा सहभागी हुन कञ्चनपुर क्षेत्र नम्बर १ मा चुनावबाट महाधिवेशन प्रतिनिधि छनौट गरिएको छ । प्रतिनिधि छनौटका लागि कञ्चनपुर क्षेत्र नम्बर १ मा आइतबार दिउँसो मतदान कार्य गरी आइतबार रातिदेखि नै मतगणना कार्य सुरु गरिएको थियो ।

सोमबार बिहान सम्पन्न मत गणनाबाट महाधिवेशन प्रतिनिधिहरूको टुङ्गो लागेको नेकपा एमाले क्षेत्रीय स्तरको निर्वाचन कमिटी कञ्चनपुर क्षेत्र नम्बर १ का प्रमुख निर्वाचन अधिकृत वेद प्रसाद उपाध्यायले बताउनु भयो ।

उहाँका अनुसार कञ्चनपुर निर्वाचन क्षेत्र नम्बर १ मा खुला तर्फ कुल २ हजार ८ सय ६ सङ्गठित सदस्य मतदाताहरू रहेकोमा १ हजार ७ सय ४० सङ्गठित सदस्यहरूले मतदान गर्नु भएको थियो । ४ जना खुला प्रतिनिधि छनौटका लागि भएको चुनावबाट वीर बहादुर थापा १,५१७, पल्लवराज भट्ट १,१५३, भक्त बहादुर अधिकारी ८०६ र हिरासिंह बिष्ट ७४१ मत सहित निर्वाचित हुनु भएको छ । अन्य उम्मेदवारहरू रोशन बहादुर खड्का (७२६), खेम सुवेदी (६५०), रामचन्द्र नेपाल (४८५)  र खेमराज ओझा (२७०) महाधिवेशन प्रतिनिधिमा छनौट हुन सक्नु भएन । त्यस्तै १ जना महिला प्रतिनिधिका लागि कमला बोहरा ९२६ मत सहित निर्वाचित हुनु भएको छ भने चित्रा देवी चौधरी (७२३) छनौट हुन सक्नु भएन ।